Matthew 24

Yesu Woi Shi Aɓo Awye Nnabye

1Ngye shi Yesu ɓo laka aduwa nyakun ba, ewo abara ɓa ɓe ɓai wu wo a nyakun nu gbo-gbo aduwa nyakun nya.

2Ama wa gna ɓa ge, “Anya mi-mi ye vinya a ɓa ɓa ɓaya to a ce kuta doho-dohoyi tu ndo sim.”

3Esa wo ɓo sase tu n Zaitun pe, ewo abara ɓa nyawo ge, aɓo deye ɓo zhin n knisayi ya? Knihi nu ɓo zhin ya kpe ge ho jeze ɓo lo, anyi ku ga zoʼa?

4Yesu wa gna ɓa ge, “Fye to ye ezaho-zahoyi wa ze fye amaman. 5Ntu ge aza mwa begye ɓo ɓe ɓai gna ɓa nu zhin Masihu, ɓa bwi aza zokwo n mwa. 6Esa fya wo okun nabari, deye to wu ge mi la ga ɓe num, tile aɓeye ɓa ɓe, ama esa kmaknayi to ɓe kpam. 7Abye n abe yi na anyi ɓo kuka da aje, mikun ɓo gun ekni ɓo shan-shan na ba yi gbo-gbo. 8Ama aɓeye vinya zhin aɓo adna nya nu n ɓa ɓo ya zhin. 9Aza vinya n anyi ɓo ga fye wahala ɓai wu fye ɓai wun fye nu, ntu ge fye zhin emi aza nu.

10“N mwa begye n fye mi n ɓa ɓo jeze na vun yi fi n laifi, fye ga fyehin, fyei wun aje nu. 11Anabi akatayi ɓo ɓe ɓo bwi aza zokwo 12Laifi ɓo mwa abaho-bahoi, yeye ɓo la fu se n aza aba n mwa. 13Ama aza n ɓa ɓo ku mi zhi, har esa kmaknayi, ɓa nu ɓo po.

14“A ɓo ku nabari manayi Shekwoyi ebe mi nya da anyi mi vinya, har abye doho-doho yi ɓo ku wo, esa kmaknayi ho kpe ɓe.

15“Esa fye gye asisi ɓo (ko nu anabi Danailu ɓo da ko ɓo) koi gni agni aba gyi-gyi-yi (fa bahin wa bwa awye ga). 16Aza n ɓa fi Yahuda ɓa ɓo busi lo ape. 17Aza nu n ɓa kpe anyakum esin ɓato ɓo shin zhi ntu ge ɓa ku ɓa kaya n ɓa apuwam. 18Aza n ɓa fi n fwa ɓa to ɓo jeze ɓe api ntu ge ɓa ku ɓa ajem.

19“Ayya n anyiko anubo da aba, n aɓiya da yi, n anyi-pyeyi hi. 20Fye zhin aduwa to efye sibui ko ɓe n viyikoyi ko n assibi wyi m. 21Wahala ɓo ɓe, edo pya anyi to shin gye m, tunyi ngye shi a ɓo zhin anyi, a taje ko pya gye m.

22“Gaiciya ndei a to ce anyipyei hi zunya n, aza vinya ɓo ku zo fi. Ama a ɓo la ɓa ce zunya ntu Shekwoyi aza kni-kniyi ɓo.

23“Njesun ko ezaho-zahoi wo gna fye ge, Kristi n la ɓe nu aba ko ye, ko n ge wo ku wohin tuko wu aba ko ye, fye to ga gaiciya m. 24Ntu ge Akristi akatayi ɓa kun, ɓedo anabi akatayi, ɓai ɓo zhin aɓo wowo har ge koi ye zhin nu, aɓo ku Shekwoyi aza kni-kniyi dna koce. 25Fye gye, mi ku kma fye gna.

26“Ko ezaho yi gna fye ge, Kristi la jeze zhi woi lo n zhabui, fye to gye fye a nuwan fya lo ge fye gye m. Ko fye wo ge wo n wohin so dna lo aba ho, fye to ga gaiciya m. 27Ntu ge ngye shi fye gye ogmai bmiya kwa ga buzangna eshe gmana nyi, elonu ko ɓa ze esa emi Kristi ɓa jeze ɓe cei. 28Aba nya fifiyi nyi, n ɓo nu agulu zhin a yezhi.

29“Nsayi-sayi yi n wahala avun dna n anyipyei hi, wyegma ɓo la dna, ntu ge nyipyei to ɓei je won, epya to ɓo je fun, akpasu ɓo kaya n she, iko eshe nya ɓo shan-shan.

30“N sayi nu aɓo gye tuze emi ɓeɓe nya eshe, bugba wun ɓo ɓe dna anyi, abye vinya anyi ɓo gye mi ɓeɓe dna anyi, n iko yi, n latu dnagmayi. 31N ɓo tnu emi amalaika yi, n kasun a knaknaci nya yi, ntu ge ɓa ye emi aza akni-kniyi zhi anyi cezhi ba vinya.

32“Fye tu deye mwi n gbahi shinwan, esa fye gye eko bwala koi ci afintolo putu, fye kpe ge vinyiko sa la wuvi. 33Nlonu esa fye gye aɓeye vinya ɓai ya zhin, fya kpe ge emi ɓeɓe la wuvi har abokunmi gbe. 34Nsa yi anyi ye ɓa ɓo duya.

35“Eshe n ʼkni yi ɓa ɓa duya, ama emi aɓeda ɓa ta shan duya m. 36Ama ezaho to lo n wo kpe nyipye ye lo ko esa nu esa kmaknayi ɓa ɓe n ceyi m, ko amalaika. Ko Shekwoyi Nugun, sai Dada gmanyi vonu kpe lo.

37– 38“Aza ɓo dagma ɓai zhin buki ɓai pa mula, ngye shi ko ɓei zhin n Nuhu ʼsa ogma dnagmanyi kwa kpe zhi nyi. 39Aza to ɓo ga gaiciya ge, ɓoho ɓa zhin m har esa ogma ɓo ɓe kwa ku ɓa wu vinya. Elo nu emi ɓeɓe ɓa ze.

40“Aza gun aba ɓo fi ɓai zhin tnu-tnu, aɓo la eza gmanyi a fa gmanyi. 41Anyikoza ngun aba ɓo fi ɓai zhin ɓa tnu-tnu api nya, aɓo la gmanyi a fa gmanyi.

42“Ntu ce nu fye zhi n shiri zhin, ntu ge fye ta kpe nyipyei ye lo nfye Dagayi wo ɓe lo m.

43“Ngye shi eza zhin wa gu wo puwa, ntu avi ɓo nyi. 44Nlo nu fye ɓa bui wahala si, fyei zhi n shiri yi ntu emi ɓeɓe ɓo.

45“Ho zhin Dagayi bara ce-cei nu n gaiciya da yi? Mi la tnu-tnu puwa bwashi nya ga ho, ha kpa mi aɓi fyegyi-fyegyi? 46Anabarka da nu n hoi ndei ma je ze ɓe ma sun ho hoi zhin ho tnu-tnu dna n gaiciya. 47N ɓo ga abara a gaiciya nya iko ɓa gyi ebe tu a nya tuko vinya n ɓa zhin emi nya.

48“Ama ndei ho zhin eza nukoyi nu, ha gna ge, emi Dagayi to ga ɓe m. 49Ha ya hoi ga abara aje wahala hoi zhin buki hoi sin nya. 50Eho Dagayi ɓo jeze ɓe to hoi dna ce m. 51Wo ɓo lu ho n mwa, woi lo n hoi n akoce-dnayi owa da ba, a ba bwici lo ai gyi anyikna.”